Vettvangsferð á vesturströndina

Ég fór í vettvangsferð um daginn í tengslum við einn kúrsinn sem ég er í. Við fórum á vesturströndina og skoðuðum Fox og Franz Josef jöklana. Það var rigning allan tíman - enda er vesturströndin þekkt sem afbragðs úrkomusvæði. Þar getur rignt mikið og lengi í einu - og við hittum inn á eitt svoleiðis rigningartímabil. Vaknaði einn morguninn við þrumur og eldingar - það hljómaði miklu betur en vekjaraklukkan mín! Við gistum í skála sem er staðsettur í Harihari. Þaðan er hálftíma akstur til Franz Josef jökulsins og tveir hálftímar til Fox jökulsins. Ég fann kort af vesturströndinni hér.

Á leiðinni til baka, í gegnum Arhtur's Pass, var aðeins kaldara þannig að það snjóaði í þrúhundruð metrum yfir sjávarmáli. Við þurftum því að setja keðjur undir bílinn yfir skarðið því hér er notkun nagladekkja bönnuð. Arthur´s Pass, eða Arthurs skarð, er fallegt skarð sem vegurinn þræðir sig í gegnum. Hæsti punktur á veginum er rúmlega níu hundruð metrar yfir sjávarmáli. Þar var því töluverður snjór og loksins var eitthvað sem minnti mann á þá staðreynd að hér er vetur!

Við stoppuðum í Broken River á leiðinni heim til að grafa snjógrifjur og fara á skíði. Myndin hérna er frá Broken River -- ekki amalegt útsýni þegar skyggnið er gott.

kv, Einar Örn